Du som er gruppeleiar, skal leie gruppa gjennom dette arbeidet. Oppgåvene dine som gruppeleiar er

• å samarbeide med læraren om planlegging og gjennomføring av Unge & Rus 
• å kjenne måla til Unge & Rus 
• å vite kva for oppgåver de skal løyse
• å sørgje for at oppgåvene blir fordelte mellom dei som er med i gruppa 
• å leie diskusjonane i gruppa og sørgje for at alle får høve til å delta
• å halde tidsfristane
• å motivere gruppa til å bli ferdig med oppgåva "vår meining" til avtalt tid
• å skrive logg

Arbeidsmetodar
I Unge & Rus er det individuelle oppgåver, gruppeoppgåver og heimeoppgåver. Gruppeleiaren må alltid vite kva for oppgåver gruppa skal arbeide med. Denne informasjonen skal du få av læraren din. Oppgåvene skal oppsummerast i plenum på slutten av kvar dag.

Samarbeidsreglar
Gruppeleiaren skal ta ansvar for at gruppa diskuterer korleis samarbeidet skal gå føre seg. Det er viktig at alle i gruppa er med på gruppearbeidet, og at alle meiningar blir høyrde!

Eksempel på samarbeidsreglar:

• Sei di meining og lytt til andre.
• Tidsfristane må haldast.
• Alle må vere med og gjere sitt beste.
• Arbeidsoppgåvene må fordelast likt.
• Problem skal løysast innanfor gruppa.
• Ein kan vere ueinige utan å vere uvenner.
• Det daglege arbeidet er like viktig som sluttproduktet.

Logg
De skal skrive logg kvar dag! I loggen tek de med

• kva gruppa har arbeidd med i dag
• korleis arbeidsinnsatsen har vore
• om gruppa har teke ansvar
• om det har gått greitt å halde avtalar og tidsfristar
• kva som har gått bra
• kva som har gått mindre bra

Bruk gjerne ei eiga loggbok til loggen.