Nuorat & Gárrendilli-prográmma ulbmilat leat ovttas skuvllain ja ruovttuin

• ovdánahttit máhtu ja dáiddu jurddašit kritihkalaččat alkoholajuhkama birra
• nannet guottuid alkoholajuhkama birra
• nannet gálggaid biehttalit gárihuhttimirkkuid
• maŋidit vuosttaš alkoholamáistima

Váhnemiid/fuolaheddjiid oassálastima ulbmilat leat

• nannet searvevuođa gaskal váhnemiid/fuolaheddjiid
• nannet váhnemiid/fuolaheddjiid áktejumi bidjat meriid mánáid gárihuhttimirkogeahččaleapmái
• nannet váhnemiid/fuolaheddjiid gealbbu háleštit iežaset mánáiguin gárihuhttimirkogeavaheami birra

Manne vuoruhit ovttasbarggu váhnemiiguin/fuolaheddjiiguin?
Go mánát šaddet nuorran, de bohtet ođđa hástalusat nuoraide ja váhnemiidda/fuolaheddjiide fas ođđa gáibádusat. Mánát ohcalit vásáhusaid gárihuhttimirkkuiguin sin govahallamiid ja vuordámušaid ektui. Válljejumiid sáhttá váikkuhit. Nuoraid váhnemat/fuolaheaddjit leat nana resursan gárihuhttimirkoeastadeaddji barggus ja leat hirbmat dehálaččat nuoraid alkohola, duhpáha ja eará gárihuhttimirkkuid guottuid ja norpmaid ektui.

Gárihuhttimirkogeavaheapmi lea riidovuloš temá, erenoamážit gaskal váhnemiid/fuolaheddjiid ja mánáid, danne bohciidahttá ge maiddái hálešteapmi gárihuhttimirkkuid birra dávjá soahpameahttunvuođa. Váhnemiid/fuolaheddjiid guottut ja geavat mánáid gárihuhttimirkkuid geahččaleami hárrái dat leat guovddážis, ii ge váhnemiid/fuolaheddjiid iežaset gárihuhttimirkogeavaheapmi. Lea jáhkehahtti ahte dán geažil smiehttagohtet sii iežaset gárihuhttimirkogeavaheami birra.

Váhnemiin/fuolaheddjiin lea váldobajásgeassinovddasvástádus iežaset mánáide, ja skuvla galgá leat doarjjan eastadanbarggus. Oadjuda maiddái sihke mánáid ja váhnemiid/fuolaheddjiid go leat oktasaš guottut mánáidbajásgeassima váttes temáide. Eaktuda ahte váhnemat/fuolaheaddjit dovdet nuppit nuppiid ja nuppit nuppiid mánáid, vai sáhttet bidjat oktasaš meriid nuoraid doaimmaide ja láhttemiidda.

Nuorat & Gárrendilli-prográmma váhnenovttasbarggu árvvoštallan čájeha ahte prográmmas lea positiiva mearkkašupmi váhnemiid/fuolaheddjiid oktavuhtii ja searvevuođa vásáhussii. Árvvoštallan čájeha maiddái ahte oahppit ja váhnemat/fuolaheaddjit háleštit dávjjit ja buoret láhkai gárrendili birra.

Árvvoštallan čájehii maiddái, ahte váhnemat/fuolaheaddjit unnán orro diehtimin nuoraid gárihuhttimirkogeahččaladdamiid birra. Prográmma lea mielde geahpedeamen dán boasttodieđu.